أعلن المصري محمد عبد المنعم، لاعب نيس، عودته لتدريبات الفريق الفرنسي، بعد فترة غياب طويلة بسبب الإصابة في الرباط الصليبي، التي تعرض لها قبل نهاية الموسم الماضي.
ونشر عبد المنعم، صور استقبال اللاعبين له في مران اليوم، وعلق عليها برسالة مطولة.
وقال لاعب منتخب مصر: ” الحمد لله دائماً وأبدا النهاردة أول يوم تمرين ليا بعد فترة هي الأصعب في حياتي دخلتني في اكتئاب وتوتر من المستقبل خلتني أشوف مستقبلي بشكل مختلف عن اللي كنت بحلم بيه بس التفكير هنا طول الوقت مش هسيب حلمي وإني أقدر أعدي أي مرحلة صعبة”.
وتابع: “حسيت بكمية الحب والتعاطف والدعم معايا لما حصلت الإصابة وده تأثرت به نفسيا بس في نفس الوقت خلاني أحس بالمسؤولية تجاههم، كنت باشتغل وهدفي قدام عيني وإني هرجع تاني وأكون عند حسن ظنهم ومن هنا وحسيت إن كل حاجة أنا وصلتلها مكنش شطارة مني ده كانت ترتيبات ربنا ليا، قربت منه أكتر، حسيت بالرضا وحسيت إن ربنا بيقولي متقلقش أنا جنبك ومش هسيبك فارتحت”.
وزاد لاعب الأهلي السابق: “وهنا التفكير اتغير لما حسيت بالرضا، النجاح مهم جداً بس الأهم منه هو علاقتك مع ربنا ومن أهم النعم الناس اللي بتحبك بصدق واللي وجودهم في حياتك بيخليك إنسان أحسن”.
وواصل: “اتعلمت إني أكون حامد من غير شروط أسعى وأشتغل وأتعب بس في نفس الوقت أحافظ على كنوزي الحقيقية أهلي وأصحابي والقلوب اللي بتقف جنبك في كل لحظة لأن دول اللي بيفضلوا يوم ما تتعب أو تمرض أو حتى ترحل واللي بيفضل فعلا هو الذكرى والدعوة الحلوة واللحظة اللي بتبقى أثر في قلب كل واحد لأن الاستثمار الحقيقي هو الاستثمار في الذكريات بيخلي اللحظات تعيش فوق عمر الإنسان”.
وختم الرسالة: “شكرا من قلبي لكل واحد افتكرني وبعت كلمة أو دعاء لي وجودكم حواليا بيكبر المعنى ويطول عمر اللحظات الحلوة شكرا على دعمكم”.